សម្ល នំបញ្ចុកណាំព្រិក
I-គ្រឿងផ្សំ
- សាច់បង្កង
- ត្រីឆ្អើ
- សណ្ដែកដី
- សណ្ដែកបាយ
- ខ្ទឹមស
- ខ្ទឹមក្រហម
- ម្ទេសក្រហម
- ផ្លែក្រូចសើច
- អំពិលទុំ
- ដូងទុំ
- ស្ករក្រហម
- ខ្លាញ់រាវ
- ត្រកួនសណ្ដែកបណ្ដុះ
- ត្រយ៉ូងចេក
- ល្ហុង
- ស្លឹកខ្ទឹម
- នំបញ្ចុក
II-វិធីធ្វើ
- បង្កងលាងទឹកដាក់ស្ងោរអោយស្អាតអោយឆ្អិន ទើបស្រង់មកបកយកសាច់បុកអោយល្អិត
- ត្រីឆ្អើកេះបកសំបកបុកអោយម៉ត់
- សណ្ដែកដី សណ្ដែកបាយលីងអោយឆ្អិន បកយកសំបកចេញ បុកអោយម៉ត់
- ខ្ទឹមស ខ្ទឹមក្រហមហាន់បន្ទះស្ដើងៗបំពង់ខ្លាញ់
- យកម្ទេសក្រហមឆ្កឹះគ្រាប់លាងទឹកបុកអោយម៉ត់
- កោសដូងពូតយកក្បាលខ្ទិះស្លជាប្រេង ហើយដួសកាកប្រេងទុក ចាក់ចូលលាយបន្តិច រួចយកម្ទេសបុកផាត់អោយឈ្ងុយដួសដាក់ចានទុក
- យកទឹកស្ងោរបង្កងទៅដាំ ដាក់អំពិលទុំបន្តិច ផ្លែក្រូចសើចពុះជាពីរច្របាច់ទឹកដាក់ហើយបង់ទាំងសំបកផង (បើទឹកមួយកូនឆ្នាំងដាក់ផ្លែក្រូចសើច៣) ដាក់អំបិល ទឹកត្រី ស្ករក្រហម ម្សៅស៊ុប ដាំអោយពុះ២ទៅ៣ អំពុះ ភ្លក់មើលអោយល្មម ទើបដាក់ចុះ យកស្បៃមកត្រងអោយស្អាត
- យកត្រីឆ្អើ សាច់បង្កង សណ្ដែកដី សណ្ដែកបាយ ម្ទេសផាត់ កាកប្រេងដូង មកបុកក្រឡុកចូលគ្នា ទើបដួសដាក់ចានគោមធំ ហើយដួសទឹកស្ងោរបន្តិចចាក់យកវែកញីអោយបែកចូលគ្នា ទើបចាក់ចូលទៅក្នុងឆ្នាំងស្ងោរទៅវិញ ដាក់ខ្ទឹមបំពងកូរចូលគ្នាអោយសព្វ ទុកទទួលទានជាមួយនំបញ្ចុក
- ត្រកួនកាត់គល់ចោល កាត់ប្រវែងពីរថ្នាំងដៃ ពុះជាបួនស្ងោរអោយឆ្អិន ហើយយកខ្លាញ់រាវមកប្រឡាក់ អោយសើមៗ
- សណ្ដែកបណ្ដុះបេះកន្ទយលាងទឹកអោយស្អាត
- ត្រយ៉ូងចេក បកយកស្រទាប់ខ្ចីៗ មកហាន់ជាសសៃល្អិតៗ ដាក់ត្រាំទឹក
- ល្ហុងចិតសំបកលាងទឹកអោយស្អាតឈូសជាសសៃ
III- របៀបរាប
- យកនំបញ្ចុកមករៀបឆ្វាយអង្វេលដាក់ចានសំប៉ែត យកដើមខ្ទឹមឈូសបញ្ឆិតៗ សងខាងហើយពុះជាពីរ ត្រាំទឹកអោយរីក ដូចជើងក្អែប ដាក់លើនំ យកម្ទេសនាងដៃទុំចិតជាផ្កាដាក់ចុងដើម
- យកត្រកួនរៀបដាក់ឆ្លាស់គ្នា និសណ្ដែកបណ្ដុះ ត្រយ៉ូងចេក ល្ហុង។
No comments:
Post a Comment